正常人當然有必要注重身體健康啦，盡量避免因病入院冒險接受庸醫劏肚，否則死咗都唔知乜嘢事。之不過如果你唔係正常人，而且係傷天害理嘅犯罪分子，身體健康實在冇乜必要注重，反而病得愈殘愈好。
點解咁講呢？事關內地執法人員欺善怕惡，對待一般老百姓就野蠻執法，若然你百病纏身患有傳染病，你通常會得到屢擒屢縱嘅優惠待遇。
好似東莞鳳崗鎮官井頭村咁吖，村民投訴當地有一名三十六歲鄒姓男子公然販毒，不過執法人員任得佢橫行無忌。上月二十九日，鄒君再次被治安巡邏人員捉住，身上搜出四、五克毒品，警方到場處理竟然放人，理由係呢一個爛手爛腳嘅典型爛仔染有愛滋病以及肺結核，看守所同監獄都唔會收容。
呢嗱嗱嗱，你話係咪欺善怕惡吖？手無寸鐵嘅維權人士一個二個關押天牢，之但係只要作奸犯科嘅壞蛋爛身爛勢，患上愛滋病以及肺結核等等傳染病，做官嘅馬上嚇到腳軟，捉完就放人，關都唔敢關。難怪當地居民痛斥：「我們這裏毒品氾濫，就是鄒和他的幕後老闆搞出來的，因為有恃無恐嘛！」警員縱放毒販令圍觀民眾大吃一驚，不禁破口大罵：「在毒販身上搜到白粉、海洛英，竟然一點事都沒有。這樣下去，販毒吸毒的能不猖狂嗎？」
油甘埔派出所一名黃姓副所長證實，鄒氏爛仔一年至少被帶走五、六次，捉完又放，放完再捉。佢話喎：「坐牢也要身體好，爛手爛腳的抓回來，反而要我們墊錢去治療。」
亦即係話，患有傳染病等同獲頒免死金牌，內地官僚照例放虎歸山自由行。問題係，無辜老百姓嘅身家性命財產點算好呢？一來咯喎，病壞罪犯搗亂社會秩序，公然販毒已經害人不淺；二來咯喎，病壞罪犯可能擴散病毒，唔知幾時導致一發不可收拾嘅瘟疫。
愛滋病喺內地《傳染病防治法》屬於乙類傳染病，同屬此類嘅仲有梅毒、百日咳、炭疽、登革熱、肺結核等等二十幾種。患者一旦犯罪，關押送監都有阻滯。《中華人民共和國看守所條例》第十條規定，看守所收押人犯應當檢查健康，患有精神病或急性傳染病均可不予收押。
喂，病壞罪犯自由行好大鑊啫，莫講話危害內地同胞，隨時又會南下香江胡作非為。萬一所患傳染病係沙士，咁就弊一弊都冇咁弊，香港唔變疫埠都幾難！
計功夫茶話齋，唔該內地官僚想辦法將病壞罪犯隔離關押，唔好再害到全人類雞毛鴨血，縱容爛仔禍國殃民好頭痕㗎！