少年動畫驚天下！原來香港有間中學啲學生，佢哋至叻3D動畫創作，曾獲多個國際動畫獎項，今年又囊括中學組一分鐘及三分鐘冠軍，認真可喜可賀！
嗱！呢啲少年，如果假以時日，而政府又肯扶助鼓勵，說不定就是未來的手塚治虫、宮崎駿等動漫大師。
之不過，政府一味奢談創意產業，由○五年董建華做特首嗰陣，講到夕陽政府快收工，依然冇一套全面推動創意產業發展嘅政策，說起都羞家。
得獎同學反映，話畢業後希望繼續進修有關課程，並投身業界，可惜，現時政府支援本土動畫製作不足，需自行尋找實習及參賽機會，甚至咁熱門嘅學科，喺學界仍屬冷門，可見政府推廣不力，師資又欠奉。
都話香港政府喺教育政策上完全失敗，一味搞「融合教育」，卻不注重推廣另類教育，有啲青少年未必愛讀文、理科，不過，佢哋喺其他學科，如創意動畫、舞蹈、武術上特別出色，真要向這方面發展，在香港實在苦無門路，畢竟體藝中學幾乎零。
再說，創意產業不會自己成長，強如美國都要通過法律法規和各項優惠政策鼓勵。文化創意產業要野蠻生長，美國人認為，國家在文化建設上，要創造相應有益於發展文化的環境；政府的主要職責，是為文化創造者提供一個公平合理、充分競爭的舞台，並給受眾提供多樣化的選擇。如今庸官都不懂文化，卻奢談創意產業，那自然嗚呼哀哉！