政情：Eric So概念車坐鎮皇東節
喺灣仔皇后大道東扎根四十幾年嘅合和實業，繼去年舉辦第一屆皇東節受到熱捧後，今年再接再厲舉辦第二屆，仲請來人氣設計師Eric So發揮非凡創意，設計一架未來環保概念車「Cell」模型，喺本月十九日嘅皇東節啟動禮中首次展出。
合和實業執行董事王永霖、合和資產管理董事梁庇世及Eric尋日齊現身，為皇東節嘅宣傳熱身。Eric設計嘅概念車可因應乘客多少而變身，一個人用車時就變番細車，多人同遊就合體變身大車，概念認真新穎。Eric原本係廣告公司藝術總監，幾年前創作李小龍人形公仔到美國參賽獲得冠軍後，又製造廿四個着住唐裝嘅李小龍參展，從此一炮而紅。
王永霖話，合和好支持環保，公司已有四部電動車，所以皇東節啟動日除咗展示未來車之外，仲會展出最新型號電動車，市民有機會免費試坐Tesla電動跑車，親身體驗部車嘅寧靜。