政情：工廈劏房戶鬧爆唐唐
高官政要落區探訪，未必一定可以成功收買人心。疑似特首候選人唐英年辭職前後探望過唔少低下階層，其中七月同呢個月頭就分別探過工廈劏房戶同套房居民，但佢唔單止收買唔到民心，仲畀人鬧爆，話佢冇資格做特首喎。
住喺大角咀工廈一間劏房、正面臨被迫遷嘅蓮姐話，七月唐唐嚟探訪佢，佢曾向唐唐反映就快無家可歸，唐唐都話蓮姐嘅環境好惡劣，仲應承盡快幫佢，但幾個月來全無下文，蓮姐只係收到房屋署嘅輪候通知，仲要等成兩、三年先有得上樓。蓮姐覺得好不滿，覺得唐唐講一套做一套。
荃灣居民亦畀唐唐辣慶，事緣上星期五唐唐同太太一齊探訪荃灣套房居民時傾開公屋問題，自稱「荃灣三無」嘅居民話唔同意唐唐講好難先搵到地方起公屋。居民又話，唐唐為咗拉攏部分新移民居民，話自己都係新移民後裔，大家都係一家人，但就完全忽略咗部分人要等成七年先上到公屋嘅問題，佢哋亦反映過食物銀行罐頭好難食，仲爆料話，唐唐到嗰時至知，原來罐頭係好難食嘅。