政情：傳范太日內公布棄選
下屆特首選舉戰波譎雲詭，疑似特首候選人唐英年同梁振英（CY）不時隔空較勁，全國人大常委范徐麗泰最近亦聘請公關公司疑似備戰。不過，有傳聞范太上月底上京時，正式被中央勸退，范太亦會喺日內正式宣布放棄參選。隨着范太正式離開特首號列車，下屆特首選舉嘅形勢漸趨明朗化，正式進入「唐梁之爭」嘅局面。
曾擔任立法會主席多年嘅范太，其民望一直保持高企，政界不時傳出范太有意競選特首，而喺最近半年，范太對於是否參選特首態度更是時冷時熱，好似喺九月初，當政圈盛傳唐唐會辭去政務司司長時，范太已經率先自稱係唐唐嘅支持者，又話唐唐參選可以接受，間接暗示自己會棄選特首。
但及至上月初，已辭職嘅唐唐被揭發有婚外情，范太對於係咪選特首又有新說法，突然話若果唐唐嘅支持度不高於其他疑似候選人時，佢不排除會參選，其後范太更直截了當話，當初答應支持唐唐，並唔知道對方有緋聞。事態發展到本月初，范太喺特首選舉一事再出招，自言「支持唐唐」呢件事已經做完，自己嘅決定同唐唐參唔參選無關係喎。
正所謂「政治一日都太長」，適逢尋日係特首選舉委員會提名期嘅首日，有傳中央正式出手勸退范太，范太亦會喺數日內宣布唔參選。咁啱周日有個講房屋政策嘅活動，范太同唐、梁都會一同出現，未知范太係咪會喺佢哋兩個面前有重要宣布呢？
冇正面回應傳聞
我哋就係咪被中央勸退一事問過范太，范太透過助手重申數日前被問及同一問題時嘅論調，即係冇正面回應問題，又相信中央會根據基本法辦事，特首會由選委會選出，再由中央委任喎。
還記得范太早於去年十二月，已事先張揚自己年紀大同健康曾經出問題，呢啲都係佢無法克服嘅缺點。其實擁有豐富從政經驗嘅范太無論係咪參選特首，相信喺政圈都會繼續擁有超然嘅地位，未來邊個做特首都應該提早向范太請教，屆時必定會獲益良多。