中環出更：肥龍拍賣愛駒健康惹猜疑
尋日兩個馬場冇賽事，但係馬圈卻暗傳一則惹人猜疑嘅消息。有傳熱衷做馬主嘅前政務司司長許仕仁（肥龍），突然以私人理由同馬會申請放棄馬主身份，將佢上一季購入、未出過賽嘅三歲新西蘭靚駒「各適其適」拍賣，倘若成事，佢名下再冇馬匹。由於情況罕見，惹來馬圈同政界中人議論紛紛。
葉澍堃感驚訝
肥龍好耐冇公開現身，咁啱尋日有傳言話佢啱啱做完通波仔手術，唔知係咪身體欠佳。不過，依家通波仔只係好小事，所以未至於嚴重到要拍賣愛駒，除非佢擔心日後為愛駒打氣時個心臟受唔住刺激啫。卓妮致電馬會大董葉澍堃打聽吓，佢話未聽過肥龍拍賣愛駒，所以佢對消息都感到驚訝。
卓妮亦問過好多圈中人，多名練馬師證實肥龍確係決定出售「各適其適」。不過，唔少名人馬主都覺得情況好唔尋常，事關馬主若非因馬匹嘅健康理由而出售，馬會通常唔會再接受同一位馬主以後再養馬嘅申請，換句話即係肥龍以後好難再以馬主身份購入馬匹，照計佢咁鍾意養馬，理應會三思而後行。
肥龍與太太羅美美過去共同擁有「有聲有色」等靚駒，仲同金管局前總裁任志剛等政壇老友合養多隻馬匹。○二年佢成為馬會大董，直至○五年返政府升任政務司司長先至辭任，現時仍掛住馬會名譽董事銜頭。按馬會規定，馬匹競投以暗標方式進行，價高者得。
卓妮