政情：趙家賢當選即席求婚
喺今次區議會選舉中，東區太古城西以過千票贏咗對手嘅趙家賢喺當選之後，立即上演一幕「求婚記」。時間關係，道具已經預先準備好，當票站主任宣布趙家賢當選，佢就示意班小學同學將一束預先準備好嘅花束同寫有求婚字句嘅心意卡，交畀都喺現場睇開票嘅女友Helen，佢仲即席下跪，Helen激動到笑住應承。至於幾時會擺酒，趙家賢話要同未來外母傾下先可以決定，不過佢嘅未婚妻覺得下年比較趕急，睇嚟可能要過多兩年先可以成事喎。
可能因為今次選舉候選人年輕化，喜事一浪接一浪，喺中西區中環贏出嘅許智峰，原來出年三月亦都會做人老竇。許智峰話，太太現時已經有咗六個月身孕，肚入面嗰個將會係「小龍女」喎。佢話今次選舉，太太雖然都有幫手，但其他義工都好錫佢，唔使許太企喺街度派傳單，淨係要佢做下後勤管理下啲物資啫。