政情：張震遠撐山東青年會
愈來愈多內地尖子嚟香港讀書，畢業後選擇留低工作，佢哋已成為一股不容忽視嘅青春勢力。上周六，由五百幾位山東籍後生仔組成嘅香港山東青年會正式成立。市區重建局主席張震遠（Barry）、全國政協委員呂明華等知名山東老鄉都現身撐場，大家講起鄉情及家鄉美食，零舍同聲同氣。
當晚青年會主席丁華等一眾骨幹忙出忙入，佢哋憑着一股「身在異鄉，不為異客」嘅熱誠，成立呢個組織，仲獲Barry、呂明華、「水餃皇后」灣仔碼頭水餃創辦人臧健和等山東前輩應承做名譽顧問。
Barry生得咁高大，一睇就知有北方人血統。雖然山東菜館喺香港唔多，不過Barry唔怕冇得食，事關媽媽及家姐經常包水餃，連水餃皮都係自製嘅添！呂明華太太係潮州人，所以屋企冇山東菜食，口痕時佢會去灣仔美利堅餐廳醫肚，至愛都係水餃。可惜當晚臧姑娘冇嚟到，唔係就可以過兩招畀老鄉喇！