政情：七君子淡化海外醫生問題
選舉委員會今日起接受報名，由私家醫生同公立醫院醫生組成嘅七人聯線尋日率先宣布角逐選委會醫學界席位。呢七個醫生來頭都唔簡單，唔少係中環名醫、留喺公立醫院嘅醫生，去到部門主管或顧問醫生級數。不過，佢哋對於醫療界敏感議題，卸得就卸，繞得就繞，連醫生最反對嘅輸入海外醫生，立場唔算激進。
「七君子」包括骨科醫生方津生、潘德鄰、高永文，外科醫生朱建華，廣華醫院外科主管嘅泌尿科專科醫生葉維晉，瑪嘉烈醫院兒科名譽顧問醫生周鎮邦，同埋瑪嘉烈醫院內科及老人科顧問醫生羅振邦，可謂粒粒巨星。
佢哋都話有共同理念，希望維護業界權益，但對於最近醫學界激烈反對嘅輸入海外醫生，佢哋就話相信醫務委員會會客觀審批呢班醫生。對於醫管局主席胡定旭最近講錯嘢激嬲醫生，有醫生組織要求新特首炒肥胡，葉維晉話佢哋對事不對人，羅振邦更唔同意用炒唔炒肥胡作為選邊個嘅標準，睇嚟佢哋立場唔算激進。