政情：逼宮風波張永霖想鬆人
香港大學徐立之上月爆出不續約事件後，被傳媒不斷揭發內幕重重，最近連校務委員會成員、港大專業進修學院（HKU SPACE）校董會主席張永霖亦捲入風波。有傳佢同徐立之意見不合，屬意徐「無得留低」，不過徐尚未離任，張永霖可能走先。張永霖尋日突然同港大劃清界線，表示唔會續任港大五項職務，雖然佢表示喺今年初已表明去意，但有委員就話從未聽聞，令人質疑佢闖咗禍後急急逃離現場。
自稱「青樓名妓」嘅張永霖近年活躍於教育界，佢喺港大身兼五職，除咗係港大校務委員會、財務委員會成員同校園發展及規劃委員會主席外，佢亦係SPACE及明德學院校董會主席。港大○四年校委會重組後，張永霖已開始出任委員，屈指一數，已任職三屆委員，近日佢捲入徐立之不續約風波，一度有傳二人因為在發展SPACE同喺打造私立大學上，意見分歧，甚至係佢「逼走」徐立之，隨後佢又主動發聲明，話經慎重考慮後，決定支持徐立之延任十八個月，態度反覆。直至尋日港大召開校務委員會特別會議後，佢又話自己已履行校務委員嘅職責，但亦尊重其他委員意見。
離奇嘅係，張永霖尋日突然主動公布明年一月約滿後，唔再續約，其餘嘅港大職務亦會隨約滿而離任。佢解釋話，唔續任係因為身兼多職，公務繁重，話年初已通知港大唔再連任喎。對於不滿徐立之嘅傳聞，以及各職務嘅利益衝突問題，佢完全唔講，只係批評個別傳媒報道不準確。
馮偉華促釋疑
港大教職員會主席張祺忠就話，從未聽聞張永霖已決定唔續任。香港教育專業人員協會會長馮偉華都認為，近月風雨多，如果因為受批評而引退，轉畀其他人做，亦無可厚非。不過馮偉華認為，徐立之風波唔會因為張永霖嘅引退而就此結束，認為佢有需要澄清是否曾向校委會施壓，踢走徐立之，令公眾釋疑。相信風波已經翻起，決定一走了之，都已經太遲。