中環耳目：洪為民愛童軍中心炸牛腩
識飲識食嘅菁英會主席洪為民（Witman）公職多，原來佢跟童軍更有緣，七年前加入做童軍，中午開餐，都揀佐敦香港童軍中心嘅中菜廳金陶軒，一味脆汁牛坑腩，每次嚟都會整番碟。
外脆內嫩 入口煙韌
Witman愛食牛腩，不時入廚炮製印尼巴東牛腩，不過講到脆炸牛腩，佢就謙稱難掌握，惟有出街食嘞。金陶軒嘅脆汁牛坑腩採用優質牛坑腩，酥炸後外脆內嫩，入口煙韌，減肥中嘅Witman都忍唔住食多幾件。
講完食，又講吓工作。身為互聯網專業協會副會長嘅Witman，近日發起網絡無障礙約章活動，呼籲政府、商界齊心推動互聯網嘅普及使用，據聞廠商會、工業總會及房協已即時響應。Witman話，無障礙網站對殘障人士幫助大，希望大家多多關注弱勢社群喎。