弊弊弊！慘慘慘！七百萬香港人無辜辜集體淪為「金翅大鑊鳥」！
因乜事幹功夫茶咁緊張？莫非二○一二世界末日提早來臨？無他嘅，因為聽到一則驚人消息，原來香港滿街滿巷都有人亂咁種植危險樹木，隨時隨地害到大家雞毛鴨血。
嗱，有一種叫做石栗嘅樹，你未必噏得出佢個名，但係你一定見過，甚至曾經喺樹下歇息乘涼或者山盟海誓。石栗英文係Candlenut Tree，因為果仁可以榨油點燈，所以又叫燭果樹。你之所以一定見過石栗，事關呢一種係廣泛種植嘅常見路邊遮蔭樹，貪佢快高長大又樹幹筆直，多到港九新界梗有一棵喺左近。
遍地植樹搞綠化本來係好事，石屎森林需要調劑嘛。可惜吖，衙差辦事一向但求就手不理好醜，石栗竟然係容易誘發癌症嘅品種，有資格改名「石慄」，驚慄個慄！
根據中國預防醫科院病毒所○五年公開嘅研究顯示，總共有五十二種危險植物有可能誘發癌症，花粉、氣味同飛絮都會影響人體健康，栽種必須慎重考慮。好衰唔衰，石栗係其中一種致癌殺手。除此之外，紅背桂、假連翹以及鐵海棠亦係香港有種植而又屬於危險類別。亦即係話，本地官僚展開綠化工程之時冇考慮清楚就胡亂栽種，唔知幾多人因此而受到病魔摧殘。
植物有毒就聽得多，包括斷腸草在內嘅香港四大毒草早就令人聞風喪膽，樹木因乜事幹會致癌嘅呢？根據註冊中醫師夏兆光解釋，植物誘發癌症係因為含有大量氧化鐵以及碳基因，人體吸收過之後會改變細胞蛋白，增加細胞含鐵量。含有過多鐵蛋白嘅細胞，一般比正常細胞嘅致癌機會高出接近一千倍，而且呢一類癌細胞耐藥性好高，要醫都難。
五十二種危險植物唔應該種植，偏偏香港就種到無處不在，你話死得唔死得？金翅大鑊鳥就係咁解。
唉，一日都係官僚作風累事。係呀，康文署係有發出內部指引提醒避免栽種危險植物，之不過咁，其他負責綠化工程嘅政府部門闊佬懶理，任得外判商想種乜就種乜。你知啦，好多人盲字都唔識得幾個，園藝從業員鬼知中國預防醫科院病毒所有乜嘢溫馨提示吖。
講開又講，當年尚未辭職考慮參選特首嘅管樹大隊長唐英年，唔係成立咗一個樹木管理辦事處嘅咩？點解呢一個辦事處唔去阻止衙差亂種致癌樹？點解容許呢一班懵丙招惹病魔害港人？
即係咁，如果有癌症病人向政府索償，功夫茶唔覺得無理取鬧囉！