醫院管理局為解決醫生不足，諗出以豁免考試方式聘請海外畢業醫生，引起本地醫學界大反彈，醫學會等醫生組織多次炮轟當局唔顧本港醫療質素，但外界就質疑本地醫生大搞保護主義。醫學會前會長謝鴻興尋日出席《城市論壇》時就大吐苦水，話如果佢哋只為自己利益，咁佢應該係第一個支持醫管局聘請海外醫生喎，此話何解呢？
原來謝醫生嘅囝囝子承父業，負笈海外讀醫，依家學有所成，正喺外國受訓。雖然佢唔肯透露囝囝喺邊度做緊嘢，但就話絕對係國際一流醫學院嘅高材生，符合晒醫管局嘅招聘條件。
不過，正因為咁，佢更加唔可以贊成醫管局咁做，因為自己身兼醫委會成員，有份審批海外醫生執業申請，一旦贊成豁免考試，就等同徇私。
原來謝醫生個囝囝都有諗過返香港執業，但做爸爸一於無情講，叫阿仔考試合格先好返港。謝醫生就為咗呢件事，畀太太鬧咗一餐，話佢唔幫個仔着想下，但佢話香港賴以成功之道，凡事相信制度，為咗捍衞核心價值，所以畀太太鬧幾句都無計啦！