政情：吳文華那些年想做歌手
立法會秘書長吳文華（Pauline）做「大內總管」相當出色，但原來佢唱歌都好得吓，少年時仲夢想做歌手添！Pauline尋日上電台節目分享人生點滴時，就自爆年少時鍾意唱歌夾band，參加過好多歌唱比賽，可惜未能突圍而出進軍樂壇，反而令佢入咗政壇做「大內總管」喎。
Pauline憶述，其父母思想好開通，冇逼佢讀書，令佢性格外向積極，讀書時做班長又做風紀隊長，仲主動幫窮學生補習同做義工，真係八足咁多爪。呢啲經歷令佢開始關心社會，於是畢業後第一份工就入咗房屋署，進一步了解廉租屋家庭嘅生活狀況同擔憂，對佢影響好深，希望將來為社會做啲事。
唔少人都讚Pauline做事臨危不亂，有大將之風，原來又係同成長經歷有關。佢笑笑口話，屋企有六兄弟姊妹，自己排第二，大家姐忙於拍拖，自己就擔起督促細佬妹做功課嘅責任，令佢明白同細佬妹相處，其實就同政府入面嘅人事管理一樣，都係要軟硬兼施，過程亦培養佢做人抵得諗，做得到嘅事會盡量做到最好喎。