政情：立會新大樓鬧管事荒
六十位尊貴嘅立法會議員，個個身嬌肉貴，平時唔單止有助理服侍，開會時想飲水、食嘢或傳紙仔畀議員，統統有「管事」幫手。不過，今時唔同往日，立法會搬到添馬艦新大樓後，原有嘅管事數目已不敷應用，搞到議員助理要做埋斟茶遞水。唔單止咁，原來管事仲要做埋咖啡閣嘅餐飲工作，礙於人手不足，有辦公室助理（ＯＡ）就臨時被徵召到咖啡閣分擔工作，ＯＡ自然有所不滿。
回想喺舊大樓年代，好多議員都會相約啲市民、團體或者業界代表到大樓開會，管事團隊會幫忙整靚個場同預備茶水。不過，搬咗去新大樓後，議員同團體開會嘅地方，變成分布喺議員辦事處各樓層嘅會議室，所謂遠水不能救近火，依家管事團隊得九個人，平時仲要抽走一個人去五樓咖啡閣，幫議員煮即食麵、翻叮麵包等，加上佢哋要應付各大小會議，邊度仲有人手走上樓服侍議員呢？
隔音未完善 工人要執漏
基於管事人手短缺，立法會秘書處現正刊登招聘廣告，以近一萬五千元為起薪點，招聘只須中五學歷，最少五年餐飲經驗，需具備飲食及款待服務經驗嘅專業人士，而且要操流利粵語、普通話及英語，受聘人會加入管事及膳食服務組嘅專業團隊，為新大樓提供優質嘅飲食及支援服務。呢份工嘅福利都唔錯，附有醫療及牙科福利，而且仲有一筆約滿酬金。
議員無人服侍之餘，仲要忍受噪音之苦。話說依家議員辦事處之間嘅隔音未盡完善，只要喺房內講嘢大聲啲，隔籬間房嘅人就會聽得一清二楚。聽講為免阻住議員辦公，裝修工人要等到辦公時間過後，先至有得上樓整番好天花同牆壁嘅隔音，仲要重鋪鬆脫咗嘅地板。
其實班管事團隊同裝修工人都幾慘，先講管事團隊，新大樓比舊大樓大四倍，加上逢周三立法會大會，奉旨開到夜晚八、九點先至完，一日返十幾個鐘，連食飯時間都冇咁滯。至於裝修工人亦唔好得幾多，長期要搞執漏工程，預計要一年至搞得掂，都係拜煲呔曾趕入伙所賜。一句講晒，呢啲咪係欲速則不達囉！