中環出更：婦女基金會晚宴籌款助培訓
婦女基金會日前舉行籌款晚宴，樂善好施嘅社會名人當然力撐啦，超過三百位高級銀行及企業行政人士、企業婦女網絡領袖及學者等代表出席，好似平等機會委員會主席林煥光、婦女事務委員會主席高靜芝等，而一直關注婦女權益嘅立法會議員劉慧卿，仲即場演講分享香港政治前路及婦女嘅前景。當晚大家慷慨解囊，最後籌得近二百萬港元。
婦女基金會行政總裁周素媚話，個活動咁成功，反映咗支持者對基金會有信心，基金會未來會透過研究，深化男性同女性喺觀念、角色、態度及行為上嘅認識，希望藉此增加基金會對社會嘅正面影響喎。
今次晚宴籌到嘅善款，將會用喺一系列專為本地女性賦權嘅社區及研究項目上面，包括幫助弱勢婦女提升佢哋嘅理財能力、為青少年提供領袖才能及性別意識培訓等。