中環出更：潮人方平設計會呔最拿手
對於一個商會或社團嚟講，會呔可以講係成個會嘅靈魂，冇咗佢，個會嘅整齊度肯定大打折扣。香港潮屬社團總會名譽會董、迦南集團主席方平（Peter），原來設計會呔真係有一手，好似潮州商會、中華廠商聯合會等商會及社團嘅會呔都係由佢操刀設計，真係唔講得笑。
卓妮早前喺一個社團活動上遇到Peter，當日佢打咗條Brooks Brothers領呔，係由藍色斜紋配以黃色底色，簡單又搶眼。原來佢啱啱去完潮州公會開會，打算為該會設計新會呔，趕喺下月底舉行嘅就職典禮上登場，所以特登打呢條呔畀班會董睇睇啱唔啱心水。
到內蒙考察 心思思想投資
講起近況，Peter話佢月前參加咗貿發局搞嘅經貿考察團，首次到內蒙古鄂爾多斯市考察，感受好深。佢話，冇諗到當地只係用咗六年時間，就由一個荒蕪嘅沙漠，發展成為今日嘅現代商業城市，仲起用全國知名建築師設計建築物，真係靚到暈。相比起香港舊啟德機場丟空咗十幾年，發展仲係停滯不前，Peter慨嘆香港真係要急起直追喇。
Peter又盛讚當地企業好聰明，好似蒙牛企業識得引入荷蘭、瑞士、奧地利等地嘅先進設備，加快生產效率。
佢仲話，雖然鄂爾多斯地理位置隔涉，要由香港飛北京再轉機先至去到，但勝在燃油礦產資源豐富，國內生產總值全國排名最高，商機無限，仲話如果香港有直航機，佢會考慮去當地投資喎。
卓妮