港鐵事故破紀錄　快快懲處防甩轆

嗱，功夫茶唔係無的放矢，港鐵加價加得密，列車事故更加密，密到連立法會都要特別加設議程討論，你話幾巴閉呢。議會公審咯喎，港府不得不和盤托出，原來港鐵單單喺今年七月至九月，列車服務延誤八分鐘或以上嘅事故就多達八十六宗，幾乎每日一宗，情況係兩鐵○七年合併以來最嚴重，問你怕未？

港鐵事故爆不停，簡直好似部失控列車咁，煞都煞唔住，議員梗係連珠炮發啦，直斥事態令人震驚，炮轟港鐵管理不善、港府監管不力，仲要求當局懲處港鐵添。面對群情洶湧，運輸及房屋局副局長邱誠武狼狽補鑊，話已經去信要求港鐵防止事故發生，如果情況依舊，可以作出懲處喎。

其實，計功夫茶話齋，港鐵近年服務大倒退，管理勁甩轆，早就要打手板以儆效尤啦。港鐵廣告話「心繫生活每一程」，依家乘客變成「心繫事故每一程」，列車故障無日無之，唔係訊號故障，就係電線短路；唔係煞車失靈，就係車長失魂。交通大混亂，乘客被玩殘，呢啲都係小事咋，最怕一旦爆出奇災巨禍，咁就恨錯難返。

古人話齋，弗備難，難必至。鐵路出事可大可小，咪輕視一個機件小故障、一次人為小疏忽呀，隨時死得人多。七月溫州發生高鐵追尾撞車慘劇，就係因為一個小小嘅訊號系統失靈，加上車長大意，最終釀成死傷枕藉。喂喂喂，港鐵每日載客幾百萬人次，市民搭車唔想搵命博，唔該港府快快對港鐵落實懲處機制，搞扣分制又好，減人工又好，面壁思過都好，總之做好你哋份工，唔好再畀港鐵橫衝直撞落去！

不過，講開又講吖，叫港府監管港鐵，即係鐵路版「講人自講」，得個講字嘅啫，咁多年嚟，港府除咗每次極速批准港鐵加價之外，其他一概不聞不問。嗱，港府港鐵閂埋門一家親，監管似有還無，呢個正正就係港鐵服務不斷走下坡，事故紀錄仲長過條路軌嘅原因嘞。

咪話功夫茶唔提醒港府，列車事故頻仍，監管互相扯皮，再咁搞落去，遲早車毀人亡嘅咋！

一句講晒，港鐵事故破紀錄，快快懲處防甩轆。列車事故涉及數以百萬計乘客安全，港鐵掌舵人唔該打醒十二分精神。至於港府咯喎，更加要認真把關，嚴格監管，唔好瞌眼瞓呀，搞到市民坐車心驚肉跳，你哋都唔會好過㗎！