政情：立會壞升降機玩殘五議員
立法會搬咗去添馬艦差不多一個月，但仲有唔少問題未解決，尋日就發生咗一單壞升降機事件，但好彩唔係困升降機啫。話說尋日內務委員會及財政委員會極速開完，時間尚早，有啲議員決定返上辦公室繼續做嘢，有啲就提早鬆人。選擇鬆人嘅財會主席劉慧卿、副主席劉秀成及專業會議議員石禮謙，咁啱三個人一齊入咗二樓中間嗰部機，打算落樓離開立法會，點知就出事。
佢哋三個入升降機後，對機門開完又閂、閂完又開，來來回回十幾次，但因為佢哋掛住傾偈，一時間唔為意部機壞咗，到察覺嘅時候，先至面懵懵行番出嚟，都咪話唔好笑。當佢哋搭第二部機走咗之後，民主黨甘乃威同張文光喺唔知情下，又入咗呢部壞機，結果當然又係走番出嚟啦！後來立法會秘書處就叫咗人去維修，相信新大樓仲咁新，呢啲小毛病只會陸續有來。