政情：肥仔明戒自助餐大犧牲
外號「肥仔明」嘅立法會議員李華明，淨係睇個身形已經知道佢識飲識食，但佢尋日出席一個預防糖尿病活動時就透露，為咗保持身體健康，佢原來已經戒食自助餐。咁大犧牲，對人到中年嘅肥仔明嚟講絕對值得，但佢有所不知喇，原來已經有酒店答應研究專為糖尿病人而設嘅自助餐，絕對係病友嘅佳音。
肥仔明之所以戒自助餐，無非係為咗控制體重，佢話自己冇患糖尿病，但血壓就唔多好喇，依家要中藥控制。不過，佢近期幫黨友拉票，唔少長者見到佢都叫佢唔好減，因為家肥屋潤有福相喎。
美女廚神麥潔兒（Kit）尋日同樣擔任活動嘉賓，佢透露自己極愛甜品，既喜歡食、又喜歡落手煮，佢以前都以為甜品只要落少啲糖就冇問題，點知原來唔係咁，佢尋日喺活動上面知道，要食得健康，第一件事係食少啲「精煉」嘅食品，肉類亦唔可以食太多，咁先合健康潮流喎。