政情：冇參選葉太忙過參選嫻姐
區議會選舉大戰前夕，氣氛理應好緊張，但面對人民力量任亮憲及民主黨林偉基夾擊嘅工聯會陳婉嫻，似乎相當淡定。前日我哋撞到佢同朋友喺中環聚會閒談，唔通佢真係信心十足？相反無落場參選嘅新民黨主席葉劉淑儀，為咗幫各區黨友助選，搞到失聲兼撞瘀隻手，同嫻姐相映成趣。
前日下午四點幾，嫻姐同一位女性朋友由太子大廈，行去對面嘅酒店送朋友搭車。嫻姐話，嗰位女士係佢喺政界師傅個女，兩人純粹出嚟聚吓、傾吓偈咁。對於明日區選，嫻姐淡淡定話有信心，當然亦會全力以赴，總之以平常心看待，心理狀態相當好。
相反，尋日喺立法會見到葉太，一臉倦容，唔單止咁，佢右手虎口位置仲瘀咗一大撻，把聲仲變埋豆沙喉。佢話前排落區助選，一下無情力撞到隻手瘀晒，然後連日叫咪，叫到尋日朝起身就聲沙，最弊係佢睇開嘅醫生出咗埠，惟有求其搵個私家醫生睇完算數。睇嚟區選之後，葉太要好好養病先得喇！