政情：區選推薦名單滿天飛

區議會議席數目就係各大黨派及政團嘅生命，臨近區選前夕大家分別發功向選民提供推薦名單。據聞建制派各區都有一份推薦名單，而我哋收到嘅神秘名單只有一頁紙，詳列咗五十二名建制派同隱形建制派候選人喺港島四區嘅參選資料，包括選區名稱同編號等，當中廿四名候選人姓名側邊仲打咗粒星，好似自由黨兩名新星，同新民黨多名年輕候選人都榜上有名。

籲投票後電郵知會 唔通有賞？

咪以為呢粒星只係亂咁加上去，據聞係代表該名候選人有機會贏得議席或有機會敗陣，所以要催谷選民投票力保議席，相反冇任何記號嘅可能代表贏梗或者輸硬。其實建制派喺選舉前向支持者推薦心儀候選人係正常不過，但最奇嘅係發出該名單嘅人士，竟然呼籲大家投票後，要發個電郵通知佢已經投咗畀名單上嘅候選人喎，難免令人有所疑竇，莫非選民跟住份神秘名單投票後會有犒賞？

講開推薦名單，「好煙民大聯盟」製作嘅廿一人候選人名單，係早前以電郵或郵遞方式，向全港九百多名候選人發出問卷，要佢哋就政府大幅增加煙稅嘅做法表態，最後得出嘅結論係，唔好將選票投喺絕大部分民主黨候選人身上，理由係該黨堅持錯誤煙民政策，此舉實在對煙民唔公平喎，究竟此舉會否進一步重挫民主黨嘅選情，時間會說明一切！

區選前出現嘅候選人推薦名單滿天飛，分分鐘連信箱塞爆，究竟啲名單係真係假，邊份名單信得過，就要考考選民嘅智慧喇。