中環出更：黃至剛入電腦店變細路
前香港賽馬會行政總裁黃至剛（Lawrence）自退休後，生活優哉游哉，時不時見佢同太太拍拖行街。日前下午茶時間，卓妮行經中環ifc商場時，又見佢同家人行街，行行吓就入咗Apple Store專門店參觀。Lawrence退休後嘅衣着依然講究，西裝骨骨，望落有型又精神。
原來Lawrence好迷Apple電腦產品，見佢攞住一本產品說明書，由桌上電腦開始一路睇到筆記型電腦，愈玩愈起勁，最後索性坐喺櫈度慢慢玩，非常認真。同行嘅女士們行到攰就坐喺店內嘅梳化上攤抖歇腳，而Lawrence就不時埋去傾兩句，費事悶親家人。
退休後常去旅行
Lawrence同卓妮講，佢嘅手機同電腦都係用呢個品牌，所以不時去了解啲新科技。講到近況，佢就話經常去旅行，周圍食吓玩吓咁。講講吓，佢就話要趕住去睇戲，之後同店員傾咗幾句後就離開，真係開心。
卓妮