中環出更：方文雄唔選立會住
上海復旦大學第五屆校董就職禮尋日喺中環四季酒店舉行，唔少復旦校董都係香港嘅商界大孖沙，好似人稱「四叔」嘅恒基地產主席李兆基、工業家蔣震、福建幫頭領楊孫西、中華總商會會長蔡冠深等。卓妮喺現場仲遇到協成行董事總經理方文雄（David），講起明年嘅中總立法會議席嘅繼任人選，佢竟然清楚一一交代。
早前盛傳花名「IQ博士」嘅立法會中總代表黃宜弘，會喺明年立法會換屆退下火線，正式交棒畀David，之後又傳黃宜弘想再坐一會連任多一屆。對於上述連串傳聞，David尋晚坦言，依家事情有變，由於為咗大局着想，黃宜弘將會再坐一會，換言之David明年唔會參選。
David話，其實佢自己份人，一向奉行「一係唔做、一係就瞓身做」，現時佢做緊嘅生意又比較忙，所以佢都擔心真係做立法會議員嘅話，會搞到自己兩頭唔到岸，到時就好難向選民交代。既然David已經諗清諗楚，怕且黃宜弘真係安樂晒。
四叔澄清辭33公司董事
至於過去兩月內辭去咗三十三間香港附屬公司董事職位嘅四叔，一現身就成為焦點，大家都想知道四叔呢個舉措，係咪為退休湊孫鋪路。不過，四叔斬釘截鐵咁話：「有限公司有成百幾間，舊到唔舊，冇用咪辭咗佢囉」。被問到啲孫仔孫女近況時，四叔即時面帶微笑話：「幾好、幾乖」，然後更預告出年農曆新年一定有利是派添！
話時話，四叔同復旦大學真係幾有淵源，事關三年前復旦大學教育發展基金會成立嘅時候，四叔捐咗一億元。
三年後嘅今日，復旦亦禮尚往來，頒咗張證書畀四叔，以示感謝四叔慷慨解囊支持。
卓妮