侵吞長者六千蚊　安老無良犯眾憎

有傳媒安排記者去私營安老院打探，話想安排患有腦退化症又領取綜援嘅外婆入住安老院，院方職員建議「全包」，即係政府每月出幾多綜援就當作住院費用，連政府派錢都要畀埋院舍。

嘩！咁仲成世界嘅？同乞兒兜𢲡飯食有乜嘢分別？你知啦，好多入住安老院嘅公公婆婆唔識得保護自己，莫講話數手指理財吖，有時連食飯沖涼都要假手於人，院方一聲唔該將人哋應得嘅六千蚊據為己有，對方毫無能力反抗，好無良啫！

保護精神上無能力自理人士嘅監護委員會就擔心嘞，問題唔止係一間、兩間院舍咁簡單。監護委員會主席趙宗義指出，如果入住院舍嘅長者神志不清，應該向社會福利署申請委任監護人，確保資產不被濫用。

社會福利署又點講呢？佢哋話喎，早於八月已經發信提醒安老院舍，不可收取政府派發嘅六千蚊作為住院費用或者其他服務費。佢哋又話，社署牌照處會突擊巡查安老院，特別留意院舍有否違規處理長者財產，如果有人涉嫌侵吞住客財產會交由警方處理。

唉，安老院無良對待老人家都唔係第一次咯，侵犯私隱又有，侵犯私處都有。功夫茶記得有一單法庭案件，安老院職員竟然賤格到餵一位婆婆食屎，原因係婆婆失禁，職員覺得煩不勝煩，所以做出咁恐怖嘅報復行為。

由於安老服務良莠不齊，所以長者社區照顧服務關注組就建議嘞，政府監管私營院舍嘅服務質素，例如規定適當嘅人手比例以及監管護理員資格。關注組亦提出，安排管理經理跟進安老服務，將服務質素低於合理水平嘅機構列入黑名單，以防長者受害。

關注組嘅建議其實一句講晒，唔該社署好好監管私營安老院。仲有一點值得注意，政府計劃最快於二○一三年試行長者社區照顧服務券計劃，資助長者選擇不同嘅私營服務。之不過咁，老人家係唔可以單靠睇廣告選擇服務㗎，如果冇全盤計劃就貿貿然推出資助券，公公婆婆只會繼續輪候津助院舍，無助於改善私營安老院嘅服務質素。

總而言之，侵吞長者六千蚊，安老無良犯眾憎，政府監管不力，等同於欺負老人家嘅幫兇！