政情：雙英談教育隔空過招
梁振英（CY）同唐英年兩位疑似特首候選人，尋日又再「前後腳」出席教育評議會一個論壇，大家都集中討論教育議題，但兩人就有唔同睇法。好似問到小班教學，唐唐話要繼續研究，CY就話除咗小班教學，係咪可以減少老師每周上課嘅節數，仲話支持十五年免費教育，但認為決策要深思熟慮，並盡快實施。
論壇上，又有人問及六四事件及內地維權人士嘅事件應否放入國民教育課程內，CY答話，即使近代發生嘅歷史事件具爭議性，都可以放入國民教育課程內，相反唐唐無正面回答，只係話每個人對六四事件都有唔同感受，下屆特首最緊要係捍衞七百萬市民嘅言論自由喎。
另外，有老師問唐唐應否喺大嶼山起個好似以前「荔園」咁嘅遊樂場，唐唐就話起多個公園係好事，因為可令學生有更多課外活動環境，自然可以健康成長喎。
教評會副主席何漢權事後話，CY熟悉教育政策，可以畀到建議，而唐唐就對教育比較宏觀，重視理念及溝通多啲。