政情：特首選委社福界大混戰
區議會仲有幾日就投票，但另一戰場特首選委會選舉，泛民主派同建制派亦已磨拳擦掌。上屆由泛民主導嘅社福界別，選委人數會由四十人增加至六十人，據聞建制派想收復失地，決定以幾個唔同團體派人分幾隊名單出選，務求漁翁撒網以增加勝出機會，而且有關組織名稱仲似足泛民，搞搞吓真係敵我難分，睇嚟社福界展開一場激烈大混戰在所難免。
近日社福界中人就發現有幾個疑似建制派組織打算落場爭選委，包括「關社聯盟」、「社福動力」、「怒火七星」及「社言港心」，後三個組織都係近呢幾個月先至成立，用意唔使多講。至於「關社聯盟」召集人余秀珠，為沙田委任區議員，亦係疑似特首候選人唐英年「家臣」林大輝成立嘅地區組織C18成員，而且更係關愛基金委員之一，係咪建制派，大家心裏有數。
中西環聯隊逾50人落場
社福界中人更透露，界內私底下普遍以「中西環聯隊」嚟稱呼呢四個組織，可想而知呢四大組織，幕後有幾大勢力支持。泛民面對強敵當然不甘示弱，暫時已知社工總會會派出三十幾人嘅名單應戰，但佢哋都好擔心今屆成績麻麻，因為四大組織估計會派成五十幾人出戰，只要有一半人成功當選，都已經搶去廿幾個議席，威脅泛民喺社福界別嘅領導地位。
上屆社福界選委選舉共有九十九人爭四十個位，今年有六十個位，候選人勢必衝破一百大關，到時入到票站揀心水候選人，肯定有排揀。所以社總已有對策，就係會將社總標誌加入選舉單張，寧願選民記住個標誌，都唔好記候選人號碼，事關百幾人好易記錯，一旦投錯票畀對家就恨錯難返。
除咗四大社福組織同社總外，其實仲有好多人都未表態參選，好似社聯、社區組織協會等都未有決定，如果佢哋又再各自組名單參選，到時最辛苦嘅，就係一班社福界選民，投票時隨時分唔到邊個打邊個都唔奇，最終對邊一方有利都未知。