醜怪咯！丟架咯！立法會經過三日激辯，尋日一如所料否決施政報告致謝動議，令曾蔭權呢張任內最後成績表又肥佬，正式係由頭衰到落尾！埋單計數，今次已經係煲呔曾在任七年第五份施政報告不獲致謝，管治成績滿江紅，咁仲唔係醜怪！
九流「政治家」搞到施政不獲「致謝」，固之然丟人現眼，但話分兩頭，致謝動議被否決完全係意料中事。過去三日，議會不聞致謝聲，只聽到炮聲隆隆，議員不分黨派、無論左右，異口同聲怒轟煲呔曾施政無能，老實講，煲呔曾冇被人要求鞠躬致歉已經偷笑啦，仲想致謝？慳啲喇！
話時話，呢份所謂「繼往開來」嘅施政報告，「開來」固然係笑話，講到「繼往」咯喎，更加不知所謂。嗱，新居屋姍姍來遲，分化社會；安老政策蜻蜓點水，聊勝於無；僱員侍產假優待公務員，激化官民矛盾；派糖小恩小惠，中產同Ｎ無人士永遠冇份。一份咁嘅施政報告，仲話要繼往開來，簡直笑死人！
即係咁，煲呔曾施政報告致謝動議遭否決，都唔係新聞咯，佢主政七年，禍港七年，施政報告唔係短視賴皮，一無是處，就係製造醜聞，添煩添亂。最經典莫過於前年嘅慳電膽醜聞，煲呔曾被指利益輸送，明益親家，成為千夫所指。所以話啫，衰開有條路，佢最後一份施政報告不獲致謝，絕對係意料中事！
咦，咪住先！俗語話，唔怕生壞命，最怕改壞名，「繼往開來」嘅真正意思原來就係一如既往被人鬧爆，一如既往不獲致謝，而且仲開創被人掟雞蛋嘅先河添，睇嚟繼任者要好自為之咯。
講開又講，致謝動議係殖民政府遺留下來嘅玩意，港英政府從未試過被否決，梗係年年行禮如儀啦。回歸之後咯喎，兩個特首衰鬥衰，致謝動議幾乎年年仆直咁滯，與其年年丟架，不如取消好過啦，無謂自取其辱吖嘛！
之不過咁，依家做官嘅個個都係被虐狂，鍾意耐不耐被人插被人鬧，先至過癮。尤其係煲呔曾呀，民望當浮雲，面皮成尺厚，唔被人掟蕉唔舒服，吹脹！
嗱，致謝就冇喇，致歉就得，如果煲呔曾想喺臨收工前留畀港人少少好印象，不如自己查找不足，然後鞠躬道歉，咁或者可以博到幾下掌聲，唔使一無所有吖！