立法會尋日完成一連三日嘅施政報告致謝議案辯論，結果煲呔曾一如所料衰收尾，最後一份施政報告都不獲立會致謝。對於煲呔曾前排喺電台話自己唔善於表達，所以有時畀人「面黑黑」嘅感覺，人民力量議員陳偉業反駁，煲呔曾過往六次上京述職，每次見到領導人都笑逐顏開、熱情謙恭地逐一握手，質疑煲呔曾對住啲有利用價值嘅人就三跪九叩都得，對啲唔滿意同冇利用價值嘅，就當垃圾同仇人處理。
