立法會新大樓已經啟用半個月，至今好多地方都係甩甩漏漏，尋日立法會投票系統仲首次甩轆。話說議員就民協馮檢基嘅施政報告修訂投票，當立法會主席要求各位議員核對表決結果時，電子螢幕顯示鄉議局主席劉皇發投贊成票，發叔隨即彈起澄清自己係想投反對票，但撳唔到個掣喎，主席見狀惟有口頭宣布更正投票結果補鑊，認真失威。
照計發叔撳唔到個反對掣，冇理由變咗贊成o架，莫非發叔撳錯掣？抑或幾個掣都壞晒呢？秘書處真係要調查吓。除咗投票系統甩轆，民主黨涂謹申都投訴議事廳內有蚊患，莫非佢已經中咗招？話時話，立會入伙後已發現死老鼠，記者室亦有烏蠅飛來飛去，再係咁落去，鼠輩同昆蟲仲惡過議員，認真係擇使，睇嚟要自備各類殺蟲工具傍身自保。
馮檢基已報名參選深水埗區議會麗閣選區，同區參選者有民建聯范國輝、人民力量趙植東與無黨派鍾詠淵，與涂謹申同區參選仲有自由黨劉啟傑同人民力量朱景亮。