政情：區會傳單晒港式英語
區議會選舉笑料一籮籮，尋日就有人發現，荃灣德華區候選人羅少傑嘅宣傳單張中英文兼備，但英文就譯到錯漏百出，唔單只文法錯誤，直頭係唔知譯咗乜嘢出嚟，如果該區有外國選民，相信唔會明佢講乜。
呢份宣傳單張得幾百字，但一開始就譯錯，第一句「I have been」已經錯寫成「I has been」，之後仲陸續有嚟，佢話為選民服務「好樂意」，就譯成「I am much happy」。最尾嗰句仲精彩，好似佢話會「全力以赴，為區內街坊福祉再次奮鬥」，就變咗「go all out for the well being of my neighbours struggling again」，如果班街坊只係睇英文，應該無邊個睇得明。
我哋問過羅少傑，佢就話篇文唔係自己譯嘅，只係助理幫佢譯，又話選舉工程逼近，助理忙中有錯都唔出奇喎。雖然羅少傑報稱無黨無派，但其實係由立法會議員林大輝籌組嘅C18成員。同區參選仲有民主黨黎敬瑋。