政情：張炳籲雙英勿充大頭
兩名疑似特首候選人唐英年同梁振英（ＣＹ），近日喺各項備選活動中大開期票，包括增建公屋、加強投資教育、甚至村屋僭建都話可以考慮放寬，如果真係全部落實晒，庫房隨時會轉盈為虧。行政會議成員張炳良就建議搵啲獨立經濟學者，幫各名候選人預早埋單計數，等各名選委同廣大市民清楚了解兌現有關期票所需要付出嘅代價。
身兼教育學院院長嘅張炳良尋日同傳媒聚會時表示，本港八間資助院校嘅校長，早前已經同ＣＹ會過面，前晚再見埋唐唐，不過唔肯透露兩人講過啲乜，淨係話開期票嘅情況在所難免，就算立法會候選人都係成日咁做。
之不過，張炳良認為任何有意參選特首嘅人，都唔可以口噏噏當秘笈，建議效法外國，當候選人拋出全套政綱之後，就搵啲經濟學者將政綱計清條數，整套建議究竟需要使幾多錢，咁成盤數出晒嚟，係假大空抑或係貼近現實，選民自然分得清楚，繼而決定投票畀邊個。