政情：安德魯王子再睇西九爛地
西九文化區擺咗咁多年，到呢刻終於如箭在弦。差不多一年前，英國約克公爵安德魯王子旋風式訪港，順道去咗睇西九發展，事隔一年，尋日佢又來港，再次去咗睇西九發展。
估唔到西九都吸引到外國關注，睇嚟當局真係要醒醒定定落實發展，否則王子第三次來港仲見到塊爛地，咁就真係失禮喇。
安德魯王子尋日去咗西九管理局位於尖沙咀嘅辦事處參觀，可惜西九管理局行政總裁連納智出咗埠，故此只係由西九行政總裁辦公室總監黃寶兒同M+行政總監李立偉負責招待。即使係咁，安德魯王子喺英國駐港總領事Andrew Seaton及其他領事館人員陪同下，都顯得好有興趣。
不過，唔知道安德魯王子又知唔知，西九董事局主席之位已經落入有「人肉錄音機」之稱嘅政務司司長林瑞麟手上呢？如果佢知道嘅話，唔知會否擔心西九前景呢？但願王子將來再有機會來港睇西九嘅時候，西九文化區唔再係爛地啦！