政情：唐唐偷食甘威得益
唐英年自從爆出婚外情後，挺唐派形容婚外情係「課外活動」、古今中外政治人物都有婚外情等等，既然建制派大降道德底線玩開放，當然唔可以寬己嚴人啦！據聞立法會就民主黨甘乃威涉嫌求愛不遂怒炒女助理事件嘅調查報告，原來一早就寫好，但建制派唔想泛民主派以唐唐婚外情做擋箭牌幫甘威辯護，擔心拖累唐唐選情，所以遲遲唔肯公開報告，變相救咗甘威一命。
甘乃威調查委員會七個委員中，有唔少都係挺唐建制派，包括調查委員會主席梁劉柔芬、副主席陳健波，委員林大輝及方剛。有關調查已經查咗接近兩年，理應乜都查得一清二楚，委員會諗住區選前夕先至公布調查結果，據聞係希望對甘威做出最大嘅殺傷力，就算唔可以成功譴責佢，都希望可以令佢嘅區選票源流失，有利建制派選情。
延公布「求愛不遂」調查
不過，班委員千算萬算，都算唔到唐唐被踢爆大搞婚外情。如果呢個時候公布甘威嘅調查報告，會令市民覺得佢哋放生唐唐，但對甘威就喊打喊殺，事關甘威單嘢，可能連手仔都冇拖過，但唐唐就係「過去完成式」，公眾會覺得佢哋厚此薄彼、寬己嚴人。另一方面，報告上會討論時，泛民一定會將唐唐婚外情單嘢擺上台幫甘威辯護，拖累唐唐選情。
據聞委員會打算押後公布調查結果，到明年三月特首選舉之後先公布，為唐唐選情掃除不利因素。政壇有陰謀論話，呢個對策簡直一石二鳥，事關明年四月公布嘅話，距離九月立法會選舉只有幾個月，甘威選情或會受損。不過，如果唐唐都冇事，對甘威嘅影響就更加微乎其微。
我哋幾個月前問過甘威，究竟知唔知份報告幾時出爐，佢就神色好凝重話：「無嘢講、無嘢講！」前日再問佢，佢都係答：「無嘢話到畀你知」，但神情就輕鬆得多，同之前個樣好唔同。甘威仲好精警咁講咗一句，話份報告幾時出，佢控制唔到，講到好似等候發落咁。而委員會主席梁劉柔芬被問到會唔會延遲公布調查結果，佢就依然封口話無嘢交代喎。