中環出更：陳英凝做慣義工懶做官
前食物及衞生局副局長梁卓偉升任特首辦主任後，其官位一直懸空，盛傳中大公共衞生及基層醫療學院助理教授陳英凝（Emily）有機會接任呢個位。不過，Emily近日表明心迹，話自己鍾意教書、湊仔同做義工幫人，多過入熱廚房做官喎！
Emily日前現身其學院嘅慈善晚宴，卓妮於是追問佢加入政府一事，點知佢直言唔會考慮。Emily喺哈佛讀完公共醫療碩士後，曾擔任無國界醫生香港辦事處主席，實戰經驗豐富，被邀做官一啲都唔奇，可惜伊人不為高薪厚祿所動。
想放時間栽培子女
Emily解釋話，一對子女分別只有六歲及四歲大，年紀尚小，想放多啲時間栽培子女。
更重要係，佢月前啱啱加入CCOUC災害與人道救援研究所，並擔任所長，不時帶隊參與海南風災、不丹火災及四川大地震等救援工作，周身唔得閒。
佢最難忘係帶住學院班醫生及義工探訪甘肅、四川等偏遠山區，向村民派發救援包，又幫村民影相留念。Emily話，唔少窮家小孩不知相機為何物，睇見一張屬於自己嘅相片，開心到笑唔停口，令到佢覺得，參與救援工作意義更大，將來仲會帶埋一對仔女去做義工喎。
卓妮