垃圾！勁垃圾！真係垃圾！
乜嘢咁垃圾？唔通唐英年又發表「垃圾論」？唔係，今次係環境局局長邱騰華講廢物處理，聽完之後你就知道點解香港有咁多垃圾官僚，呢啲垃圾唔清除，香港都幾難有運行。
話說立法會第二日辯論施政報告致歉議案……呀，唔係，係致謝議案至啱。喺「優質生活」辯論環節，議員炮轟當局減廢不力，廢到無倫，搞到都市固體廢物不減反加，而電子廢物處理等重要措施更加一拖再拖，至今落實遙遙無期。
面對群情洶湧，你估邱騰華點回應呢？犀利咯，佢先耍一輪太極，將舊有政策炒一次冷飯，又話下月將會向立法會提交第二階段膠袋稅及廢棄電器徵費建議，又話明年會就興建焚化爐申請撥款。然後再嚟一招惡人先告狀，話減廢要三管齊下，可惜擴建堆填區議員唔接受，引入焚化爐社區有擔憂，源頭減廢業界又反枱。於是乎，佢反問議員應該點樣減廢喎。
所以話，港產官僚只識推莊卸責，咁仲唔係垃圾？喂，如果邱騰華記性唔好，功夫茶提醒你兩件事，第一，制訂政策，推行減廢措施係港府嘅責任，唔好諗住卸得就卸；第二，做環境局局長嘅人係你，唔係議員，更加唔係普羅市民，唔好本末倒置，轉移視線！
即係咁，焚化爐一向被視為厭惡性設施，地區居民反對乃人之常情，正正因為咁，先至需要港府斡旋，同居民溝通，擺平各方利益，消除反對聲音，如果唔係，納稅人每年用咁多錢請你哋班高官返嚟做乜？唔通淨係食飯製造廢物？
話時話，邱騰華反問議員點樣減廢，市民其實都好想反問班高官，你哋識吹唔識做，講咗唔算數，咁就叫為官之道？咁就叫福為民開？咁就叫做好呢份工？呢，邱騰華講完廢話，又到食衞局局長周一嶽廢噏，佢出嚟交代十八區興建骨灰龕進展，點知又係大玩拖字訣，講咗等於冇講。唉，再咁拖落去，港人死無葬身之地事小，話唔定日後要與垃圾同眠事大！
有人話，香港減廢迫在眉睫，其實計功夫茶話齋，港府清理人形固體廢物嘅迫切性更加刻不容緩。邱騰華減廢七年一事無成，考察日本歸來方案仍無影無蹤；周一嶽建骨灰龕賴皮卸責，一味做諮詢騷，諮詢完就關人個關。事實證明，港府根本就係一個廢物中轉站，專收垃圾！
一句講晒，減廢由源頭做起，如果可以將嗰啲垃圾官僚送去堆填區，香港或者真係可以見到藍天白雲，港人可以過番幾年優質生活都未定！