政情：新立會大樓淪大白象
立法會議員不時批評政府嘥錢，起埋啲建築物係大白象，不過愈來愈多事實證明，喺添馬艦新落成嘅立法會綜合大樓至係一隻大白象，除咗會議廳大到議員個個玩自閉，新大樓嘅會議廳前廳、咖啡閣等都成日拍烏蠅，裝潢得幾咁美輪美奐都冇用，喺呢個甲級寫字樓位置，不如諗吓點樣提高使用率仲好過。
議員倡開放設施
斥巨資興建嘅立法會新大樓，好多地方設計上有問題，例如以往舊大樓嘅會議廳前廳（Ante-chamber）係議員打躉嘅好地方，每當未到佢哋發言，都會長駐前廳，所以官員拉票時，只要去前廳逐個逐個議員捉住箍票，就已經搞掂。但今時唔同往日，新樓大都有前廳，而且地方仲比以往大，有成兩層樓，但成日都水盡鵝飛，因為立法會大樓高層就係議員自己嘅辦公室，既然喺前廳休息，倒不如返去自己間房仲好，夠晒私隱，難怪好多官員都話拉票比以前難好多。
既然係咁，有議員就話不如開放埋個前廳畀記者好過啦，咁樣又可以拉近議員同記者嘅距離，又唔使「吉」咗個前廳咁浪費，兩者兼得。
至於五樓嘅咖啡閣，其實水準唔錯，而且價廉物美，好似一份牛油多士都係七蚊雞、一杯特濃咖啡都只係八蚊，喺金鐘呢一區絕對係好有競爭力，但慘就慘在只係開放畀議員，或者要議員帶領先可以入去，公眾人士如果旁聽完會議後想去歎番杯咖啡，就唔得嘞。
就係因為咁，如果唔係開會嘅日子，咖啡閣可以話無人問津，就算喺立法會新大樓做嘢嘅議員助理想幫襯都唔得。所以同樣有議員希望，秘書處可以開放埋呢個好地方畀公眾同記者入去，一來等立法會香濃咖啡可以得以揚名，二來咖啡閣生意多咗，絕對唔係壞事。
立法會舊大樓一九八五年復修後啟用，一直都無大問題，只不過呢度以前係「大葛樓」，耐不耐有人傳吓聽到怪聲，原來一環扣一環，全部都係智慧。新大樓周身唔聚財，大又點？大而無當，總係欠缺咗個靈魂。