中環出更：股神之子不愛投資愛「作樂」
「股神」巴菲特喺金錢世界呼風喚雨，佢點石成金嘅超能力吸引無數信徒緊緊追隨，不過，佢嘅細仔彼得巴菲特（Peter Buffett）就極力擺脫父母嘅庇蔭，活出自己精彩嘅音樂世界。尋日Peter現身調景嶺知專設計學院，同數碼音樂及媒體高級文憑十位學生同台演繹佢嘅名曲「Plastic Tomb」，分享大家對音樂嘅狂熱。
老巴菲特共育有兩子一女，Peter笑稱對投資冇乜興趣，自己嘅錢都交晒畀哥哥打理。有個咁知名嘅爸爸，Peter被追問爸爸嘅事多過講自己，佢坦言後生時會覺得好挫敗，但依家已處之泰然，仲好阿Ｑ話咁樣幾好，可以吸引大家坐低聽佢講音樂。
為《與狼共舞》配樂
Peter有名校史丹福唔讀，毅然退學轉投音樂懷抱，咁有藝術家脾氣，唔做呢行就真係浪費晒喇！佢擅長作曲，奧斯卡得獎大作《與狼共舞》嘅配樂就出自Peter之手。