中環出更：媽打發功幫中大籌千萬
前民政事務局常秘媽打李麗娟（Shelley）退休後，變身「籌款天后」，繼早前幫港大籌款，前晚輪到中大，為公共衞生及基層醫療學院「撲水」。媽打吸財力勁，輕易籌得千萬元，比原來二百萬元目標多出四倍。
公衞院十歲生日，前晚喺沙田凱悅酒店筵開廿多圍，名醫、善長雲集。公衞院造福貧苦大眾，名人爭住「揼水」。莎莎老闆郭少明、太子珠寶鐘錶主席鄧鉅明各捐三十萬元。鄧鉅明自爆當年讀到中三止步，無緣讀大學，做盡各行各業，全靠奮發向上，先至有今日成就，聽見大學有需要，樂於做善長喎。
理文造紙太子爺李文俊亦捐出二十萬元，但佢唔得閒，派妹妹李文慧撐場。捐得最豪，係馬會，一口氣捐出七百萬元，Shelley話喜出望外，無諗過會籌到咁多。
阿瑟王慨嘆徐立之辭職
派對上，新舊中大人齊現身，除校董會主席鄭海泉、前校長李國章，對面海嘅港大校董會主席梁智鴻都嚟撐場。講起港大校長徐立之劈炮唔撈風波，阿瑟王李國章都搖頭嘆息：「有校長辭職，梗係可惜！」
晚宴高潮係名醫表演環節，新界東醫院聯網總監馮康變身「二胡王子」，拉奏多首經典金曲，台型十足，中大醫學院院長霍泰輝聽到拍爛手掌。主持見佢咁High，捉佢上台同前港大醫學院院長鄧惠瓊即興唱番首《月亮代表我的心》，霍院長緊張到忘記歌詞，以「啦啦啦」打圓場，引來歡笑聲不絕。
卓妮