領匯車場管理惹不滿
慈雲山慈樂邨一期停車場屬領匯轄下停車場，租戶阿文（化名）發現車場管理質素大不如前，「月租貨車位泊咗部私家車，竟然成七日都冇人理，停車場啲燈壞晒又唔換，晚晚都搞到黑麻麻，都唔知佢哋（領匯）收完租做過啲咩？」
慈樂邨一期停車場外判管理公司發言人表示，事發後已向錯誤停泊的私家車主發信警告，要求車主只可停泊於已登記的指定月租車位，事後再無發現違規情況。發言人又稱，會加緊留意場內設施損壞情況，並盡快安排更換已損壞的照明設施。
不過，阿文仍感車場晚間燈光昏暗，且常有陌生人於車場內徘徊，「慈雲山其實都幾雜，又唔知嗰啲係咩人，泊架車喺度真係會擔心！」阿文要求管理公司兌現承諾，盡快維修照明系統，以加強保安。