「廿一世紀乜嘢最貴？人才！」記得電影《天下無賊》呢句經典對白嗎？今時今日，全世界都出盡法寶，為招攬人才打崩頭，唯獨香港反其道而行，莫講吸引人才，就算有人才都留唔住喇。
有辦你睇o架，呢，香港大學校長徐立之宣布唔續約，明年八月底任期屆滿就走人。佢嘅解釋係，自己做咗十年港大校長，所有機構都要更新，呢個係唔續約嘅唯一理由，仲強調事件同政治因素無關喎。你信唔信吖？其實細路仔都睇得出，徐立之唔續約，根本就係同政治因素有關，如果港大唔係發生嗰場保安風波，又如果唔係有人將嗰場風波政治化，佢又點會意興闌珊吖！
徐立之係喺本港接受教育，海外揚名嘅遺傳學專家，學術上有卓越成就，又有豐富管理經驗，喺佢主持校政之下，港大吸引唔少國際優質教學人才，研究成果得到提升，國際地位亦得到鞏固，可以講係功不可沒。如果佢繼續主政港大，無論對學校定學生都係好事，家陣佢突然話唔續約，無論點睇都係港大嘅損失。一間馳名國際嘅高等學府，竟然容不下一位馳名國際嘅學者，唔止係港大嘅悲哀，而且係香港嘅悲哀。
亦難怪嘅，徐立之一介書生，無喇喇捲入政治風波，仲要成為焦點，面對文革式嘅「大批判」，搞到裏外不是人，乜嘢雄心壯志、遠大理想都冇晒啦。與其留低做磨心，畀人指指點點，說三道四，不如一走了之，優游自在。
回歸以來，香港愈來愈政治化，成日紛紛擾擾，吵吵鬧鬧，簡直淪為九反之地。港府無能，政客無良，市民無奈，正正係香港嘅真實寫照。喺泛政治化環境下，暴力抗爭已經成為家常便飯，連立法會亦被煲呔曾稱為「黑社會」，簡直貽笑國際。
秀才遇到兵，有理說不清，喺呢個黑白顛倒，烏煙瘴氣嘅城市，徐立之點可能做好學術研究？點可能作育英才？點可能專心做校長？其實莫講徐立之，有名望、有能力嘅人才都怕咗香港喇！
國之將亡，必有妖孽。香港回歸十四年，不斷內耗、不斷沉淪，再咁落去，香港遲早玩完，有人才都冇用。嗱，歷史一定會記住呢班禍港亂港嘅罪人！