夕陽政府最後一份施政報告，教育方面幾近交白卷。教育評議會副主席何漢權狠批——香港教育進入消音狀態中。用到「消音」，六大產業的教育之一，確是不提也罷！一提也只能用「悲壯」形容之。
特區政府搞教育一味添煩增亂，實事做唔到，十五年免費教育如今仍在「夢醒時分」，你話小朋友嘅明天點會更好？
政府好大喜功，不作充分諮詢不顧現實，致力開發推動電子教科書，由教育局副局長陳維安主其事。唔使問阿桂，又係雷聲大雨點小，說甚麼「善用電子學習優勢、優化教科書供應」，最後一輪大龍鳳，政府冇落實措施，又冇認真投放資源，爛尾收場！
何漢權就講得啱，電子教科書問題一籮籮，不少教育先進地區如日本、台灣，紛紛打退堂鼓，唯獨香港教育局以後發制人之勢，以發展電子教科書作為大政策之一，無深入研究及論述，以為一個勇字就可以。老朽假假地都教咗二十多年書，呢啲咁嘅花巧嘢，美其名曰「優化」，其實係「唔化」。香港貧窮人口百多萬，在職貧窮又幾十萬，民生多艱，根本玩唔起呢啲創新科技，教育局推行又唔畀資源，一味充大頭鬼。電子教科書搞唔成，分拆教科書又多阻滯，總之搞到師生、學校、家長雞毛鴨血，呢啲咪就係死要虛榮，不肯務實嘅教育虛火囉！
教育嘅嘢，有陣時簡單就是美，唔使咁多「多元」、「探討」、「深究」嘅。本末倒置，教育成功，學生失敗，家長痛苦！
施友朋