中環出更：周振基 鄒燦林歎茶 「粵」傾愈開心
香港地「潮人」多，唔少更喺商界獨當一面，好似白手興家嘅潮州商會第一副會長周振基（Stephen），就喺汕頭創立半導體原材料公司。卓妮日前遇到佢同粵劇發展諮詢委員會主席鄒燦林（Charles），一齊喺尖沙咀富豪酒店富豪軒歎茶，邊食邊傾粵劇發展。
原來Stephen都做過「粵諮會」主席，同Charles一樣都係超級粵劇迷，不時約埋唱曲。Stephen拜師粵劇名伶林家聲，學唱曲十多年。為練聲線，林老師約佢每朝清晨五點半行上飛鵝山，喺山頂放聲大嗌，行足一年，風雨不改，如今果然聲如洪鐘。
不過，Stephen近年工作忙，將全副精神放在家族生意及「潮商」嘅工作上，練歌只係偶一為之。Stephen嘅廿九歲兒子周博軒都加入「潮商」，成為最年輕會董。Stephen笑言，佢當年以三十四之齡入會，已係最年輕嘅會董，估唔到囝囝更青出於藍，真係飲得杯落。
卓妮