中環出更：着自家潮鞋 劉舜慧「型男」上身
今時今日嘅事業型女性，扮靚至高原則係追求自我，連鎖鞋店Le Saunda行政總裁劉舜慧（Alice）就係箇中表表者。
漆皮鞋面 前後包「金」
身材嬌小嘅Alice，前日現身公司業績發布會時，將自己打扮到好似個男仔咁，黑色中袖企領西裝褸襯上窄腳褲，腳踩自家新品牌Linea Rosa最新時款「Kate系列」意大利牛漆皮平底鞋，顛覆晒一般高級行政人員嘅裝扮，型爆！
Alice話，呢對新鞋啱啱喺內地推出咗十日，香港仲未有得賣，售價約二千元。新系列嘅特色係玩金屬設計，鞋頭同鞋踭都包住金色金屬，加上閃令令嘅漆皮鞋面，型格十足，佢梗要先試為快，佢爆料話名人丁子高都有一對添！Alice笑稱，平時自己都會着高踭鞋，只要靚嘅鞋都會着，但今年流行Boy Friend Look，佢都要玩埋一份喎。
出身於Le Saunda買手嘅Alice，係香港精神嘅典範，佢靠自己努力攀上事業高峰，兩年前升任公司行政總裁，確係名副其實嘅叻女。
卓妮