中環出更：久休現身馬場Rita劉養病憔悴
前商務及經濟發展局局長劉吳惠蘭（Rita）自從四月傳聞因為患上結腸癌而宣布辭職後，至今已經逾半年時間，期間一直未有露面，睇嚟應該係接受治療同喺屋企安心養病。究竟Rita近況如何呢？相信好多人都好關心，卓妮就喺啱啱過咗嘅周日遇到Rita同老公劉志強入跑馬地馬場，為其有份嘅政務官團體馬「勝任有餘」打氣。
當日Rita一身休閒打扮，戴住一副深啡色太陽眼鏡，再配上一件啡色花紋長袖衫及淺色長褲，翹住老公一齊步入馬場，期間非常低調。
起初卓妮仲以為眼花認錯人，但睇真啲原來真係佢喎，於是等佢哋離開時上前打個招呼，問候吓Rita嘅近況，點知佢忸忸怩怩唔肯講，仲好緊張匿喺老公背後添，十足當日前廣播處處長朱培慶匿喺艷女Coco後面咁。
身形無乜點變
據聞Rita本月底就會完成化療程序，治療過程相當順利，佢近日亦開始約會老友出來食飯見吓面，講吓自己嘅近況。雖然Rita康復情況理想，但見佢臉容憔悴咗好多，不過身形就同辭職前差不多。當日醫管局主席胡定旭都有入場為愛駒「心路」出賽打氣，Rita一見到肥胡，就主動上前打招呼。
卓妮喺場內又見到平等機會委員會主席林煥光（WK）同太太拍拖湊熱鬧。WK話自己冇養馬，亦都冇投注，淨係同太太行吓散吓心喎。卓妮仲見到WK好細心咁扶住太太落樓梯，真係恩愛。
卓妮