政情：立會配套差虐待司機
立法會新大樓投入運作已經成三個星期，但係仲有唔少執漏，唔少立法會議員都呻話真係新不如舊。好似個停車場咁，又冇洗手間，又冇休息室，一班負責接載議員嘅司機擔心老細搵唔到自己，分分鐘人有三急都唔敢行開，簡直係虐待。
以前舊大樓雖然地方唔大，但勝在夠方便。立法會議員葉劉淑儀話，以前舊大樓細，司機萬一人有三急行開行埋都好快返到停車場。依家新大樓地方大，但設施配套反而唔多掂。停車場又冇司機休息室、又冇洗手間，司機焗住喺部車度等，要方便惟有上大樓，行返去停車場都要一段時間。唔知葉太係咪急住要用車，司機又唔見人，所以先有感而發呢﹖
立法會喺會議廳外走廊加咗啲枱方便記者喺度工作，但可惜冇插蘇叉電，用電腦時好唔方便，唯一嘅拖板都插滿電掣，如果唔盡快改善，分分鐘火燭都有份。