政情：太鼓達人係心靈醫生
太鼓，平時機舖都有得玩，手機都有，但日本就有個太鼓達人打太鼓打到出神入化，觀眾聽到流淚，暴青跟佢打完仲會「從良」﹗呢位嚟自日本嘅太鼓一代宗師叫林英哲，就係佢發明背向觀眾打太鼓，又令太鼓走向專業化，推至國際，呢種本來喺日本不受重視嘅傳統祭祀配樂，因為佢，得以重新興起。
日本國寶林英哲過去曾經喺四十一個國家表演太鼓，美國前總統布殊、英國王儲查理斯同已故王妃戴安娜曾經都係佢嘅座上客！林英哲話，打鼓聲對個人品格修為有好大幫助，青少年可以透過打太鼓發洩情緒，安靜心寧。聽講大人聽完佢打鼓會感動到喊，細路聽完就會安寧到瞓。點解咁犀利？林英哲就解釋，因為太鼓鼓聲同人嘅心跳相近，所以不論你係男女老少，不論膚色，只要你有「同一種心跳」，聽完之後，心靈都會變得特別寧靜。
林英哲明、後兩日喺尖沙咀文化中心演出兩場，但門票已經全部賣晒。