政情：蔡堅大傷風鼻旁拮針止鼻水
中醫針灸博大精深，就連身為西醫嘅香港醫學會會長蔡堅都有針灸。佢尋日出席聯席香港醫療水平關注組記者會時，見佢鼻旁兩邊插住針灸用嘅幼針，郁起來真係條條fing，認真搞笑，後來先至知道佢做緊針灸。原來上星期到內地交流後冷傷風返港，擔心食西藥會眼瞓，於是用針灸拮入鼻旁兩邊，既通鼻塞、止鼻水，又唔眼瞓。
蔡堅話，佢十年前學過針灸技術，連證書都攞埋，又話中國針灸已被西方接受，西方更發展出自己一套針灸方法，而佢學嗰套針灸方法係外國個套，其實中國針灸方法差唔多，只係拮針位置用一個號碼代替中國針灸嘅穴位。唔怪得問佢拮邊個穴位，佢都講唔出啦。
雖然蔡堅行醫多年，但佢都認同針灸使得，仲話多年前喺加拿大考當地執業試時，遇上大傷風，於是用兩針插鼻樑，考足四個鐘試都好精神，仲順利過關添，但佢考完試後將針掹出，就即刻鼻水長流，證明針灸止鼻水好使得。