政情：唐唐澄清「備選」CY釋法無表態
下屆特首選舉嘅新聞日日新鮮，三名疑似特首候選人唐英年（唐唐）、梁振英（CY）同何俊仁尋日首度前後腳出席「ICT動力與特首備選人會面」，當中正考慮係咪參選嘅唐唐對主辦單位用「備選」呢兩個字最有意見，佢會見傳媒時先後三次澄清自己正在考慮，而非「備選」特首，有次仲手指指話「後面個title係錯嘅」，嚴肅聲明自己唔係「備選」。
唐唐澄清「備選」呢兩個字火力十足，但當被問及基本法二十三條立法時就僅稱二十三條立法係一個嚴肅同大問題，任何有意參選特首嘅人士都必須要答呢個問題，所以倘若佢決定參選時亦會交代。
至於外傭居港權官司應否提請人大釋法，唐唐認為外傭有居港權唔符合佢哋來港嘅原意，所以希望輸咗官司嘅政府盡快上訴至終審法院。至於CY，佢冇表態係咪支持釋法，僅稱要慎重評估釋法同唔釋法嘅影響，佢會睇過判詞後才作評論。
鐵頭仁成副戰鬥格
早就表態有意參選嘅民主黨主席何俊仁，一直都畀人當透明，今次有份獲邀出席會面實在別具意義，難怪鐵頭仁即時擺出一副戰鬥格，而且句句有骨話呢個係第一個平等對待佢嘅團體。