政情：鄉議局選委分配爆內訌
選出下屆特首嘅選舉委員會年底就會選舉，由於選委人數增至一千二百人，所以多個界別嘅選委人數都有所增加，其中鄉議局界別就由廿一人增至廿八人。原本鄉議局轄下廿七個鄉事委員會主席全部進身選委夠有凸，但主席劉皇發卻將新增嘅位分配畀其他局內人，令南約其中六名鄉委會主席冇得做選委，結果惹來不滿，如果協調不果，隨時需要投票選出選委。
鄉議局主要由大埔約、元朗約及南約三個部分嘅鄉委會組成，發叔喺對上次鄉議局執委會上一錘定音，希望將廿八席選委平均分成四份，即每個約分到七席之外，其餘七席就由佢聯同兩個副主席張學明及林偉強研究，喺其他增選委員、特別議員及新界太平紳士裏面挑選。會議當日，冇一個鄉紳反對發叔呢個建議，但事後就傳出不滿嘅聲音。
若傾唔掂數 三個約齊齊投票
原來南約十三個鄉委會未能成功協商出七個鄉委會主席出來做選委，消息透露，南約喺上星期二執委會當日已經傾掂由今屆選委續任，據聞討論過程並無諮詢晒所有持份者嘅意見，結果咪引起不滿。由於鄉議局選委選舉屬整體性，所以如果南約傾唔掂數嘅話，就算其他兩個約都係只得七個鄉委會主席唔使爭都好，都無可避免要同南約一齊參選同投票。
有鄉議局中人話，今年鄉議局選委既然加到廿八個，最公平做法當然係平均分晒畀廿七鄉啦，話晒普遍鄉委會主席都係由村代表透過選舉產生，夠晒民意基礎，加上為鄉議局同新界人効力，分一個選委席位絕對唔過分啫，以前得廿一個位就話冇得講，如今加多七席仲係分唔勻嘅話，咁就真係講唔過去喇。鄉議局經常話要和諧，可惜發叔今次棋差一着。
據聞西環短期內將會同鄉議局食飯，但未知會否因為鄉紳嘅不滿而出面調停，幫手理順反對聲音。究竟最後有冇人會被勸退、會否需要透過選舉選出選委，相信短期內自有分曉。